PS fiton Astirin dhe Laprakën, Veliaj: Shtrijmë dorën e bashkëpunimit

Partia Socialiste ka fituar në zonën e Astirit në Tiranë dhe për kryebashkiakun Erion Veliaj, kjo ishte ‘’qershia mbi tortë’’ e fitores së partisë në të cilën bën pjesë. Sipas Veliaj, fakti që Astiri ka votuar 60% për PS, është një ‘’lajm fantastik’’, pasi kjo zonë ka qenë pjesë e debatit publik prej kohësh.

“Gjithmonë kam besuar që një minorancë e zhurmshme nuk mund ta ndalojë shumicën e heshtur të njerëzve të mirë, të drejtë dhe të njerëzve të punës. Se kam të drejtë, e garanton fitorja jonë sot në këtë zonë, të përdorur keq nga politika. Shumica dërrmuese e njerëzve do punën dhe jo dhunën, do dashurinë dhe jo urrejtën, do që të ecim përpara dhe jo mbrapa. Kam besuar gjithmonë te familjet e ndershme, të drejta dhe punëtore të Astirit dhe ju them atyre faleminderit që besuat te ne”, tha Veliaj, i cili theksoi se projekti i Astirit do të përfundojë në fund të vitit.

Drejtuesi i fushatës së Partisë Socialiste në Tiranë foli gjithashtu për fitoren në Njësinë 11 në Tiranë, që i përket zonës së Laprakës. Edhe pse një fitore e ngushtë e PS në këtë zonë, Veliaj u shpreh shumë i lumtur, sepse sipas tij kjo është njësia e cila në 30 vitet e fundit ka qenë një njësi tradicionale e djathtë.

“Jam shumë i lumtur që njësia 11, edhe pse bastion i djathtë na dha besimin neve të Partisë Socialiste për drejtimin e Shqipërisë. Dua t’ju them atyre që s’kanë votuar PS-në, se askush s’ka humbur në këtë njesi, miqtë demokratë do gjejnë dikë që i ndihmon, që i dëgjoj dhe që do ju shërbejë”, deklaroi Veliaj.

Sakaq, ai tha që muaji i ardhshëm do të jetë muaji i vëllazërisë, ku do shtrihet dora e bashkëpunimit, pasi janë kundërshtarët e PS-së, por jo armiqtë e tyre. Veliaj përmendi gjithashtu kandidaten e PD-së në këtë zonë, Albana Vokshin, për të cilën u shpreh se është njeri i mirë, por në partinë e gabuar.