Pse Macron i doli në krah Gjermanisë, përplasja e ashpër me Elon Musk

Presidenti francez Emmanuel Macron ka ngritur akuza të forta ndaj Elon Musk për “ndërhyrje të drejtpërdrejtë” në zgjedhje në shkallë globale, përfshirë ato të Gjermanisë që pritet të mbahen muajin e ardhshëm. Duke folur para ambasadorëve francezë të hënën, Macron shprehu shqetësimin se pronari i një prej rrjeteve sociale më të mëdha në botë po mbështet lëvizje politike ekstremiste dhe po ndikon në proceset demokratike.

“Nëse dikush do të na thoshte dhjetë vjet më parë se një sipërmarrës i madh teknologjik do të mbështeste një lëvizje të re reaksionare ndërkombëtare dhe do të ndërhynte në zgjedhje, përfshirë ato në Gjermani, kjo do të dukej e paimagjinueshme,” deklaroi Macron.

Komentet e Macron pasojnë mbështetjen e hapur të Musk për partinë gjermane të djathtë Alternativa për Gjermaninë (AfD). Musk e ka përshkruar AfD-në si “shpresën e vetme për shpëtimin e Gjermanisë” dhe ka hedhur poshtë karakterizimin e saj si ekstremiste. Në një kolonë opinioni për gazetën Ëelt am Sonntag, Musk shkroi: “Alice Weidel, udhëheqësja e AfD-së, ka një partnere të të njëjtit seks nga Sri Lanka. A ju duket kjo si ekstremizëm?”

Kancelari gjerman Olaf Scholz iu përgjigj këtyre deklaratave duke nënvizuar se Gjermania është një demokraci e fortë që nuk ndikohet nga deklaratat provokuese të individëve të pasur.

Ndërsa kritikon Elon Musk, Macron ka ritheksuar mbështetjen për presidentin e zgjedhur amerikan Donald Trump. Ai e cilësoi marrëdhënien midis Francës dhe SHBA-së si një partneritet të fortë, duke shtuar se Trump “ka një aleat të fortë në Francë”. Macron planifikon të mirëpresë Trump gjatë vizitës së tij në Paris për rihapjen e Katedrales Notre-Dame.

Ndërkohë, Macron duket se është bërë pjesë e një bashkëpunimi më të gjerë evropian për të sfiduar Musk. Përveç tij, liderë si Sir Keir Starmer dhe kryeministri norvegjez kanë kritikuar publikisht Musk për retorikën e tij dhe ndikimin e tij në zgjedhje.

Ndërhyrja e Musk në politikën gjermane dhe mbështetja e tij për partitë e djathta ekstreme në Evropë ka shkaktuar reagime të ashpra në mbarë kontinentin. Një zëdhënës i qeverisë gjermane minimizoi ndikimin e tij, duke deklaruar se shumica e popullatës gjermane është “e arsyeshme dhe e imunizuar ndaj retorikës së pavërtetë ose gjysmë të vërtetave”.

Në Mbretërinë e Bashkuar, kryeministri dënoi ato që i quajti “gënjeshtra dhe dezinformata” të përhapura nga Musk, të cilat, sipas tij, minojnë proceset demokratike. Musk, ndërkohë, ka përdorur platformën e tij, X (ish-Tëitter), për të kritikuar liderët britanikë dhe për të bërë thirrje për zgjedhje të reja.

Ndërhyrjet e Musk në politikë dhe mbështetja e tij për lëvizje kundër-establishmentit në Evropë po ngrenë pyetje serioze rreth ndikimit të rrjeteve sociale dhe miliarderëve teknologjikë në demokracitë e botës. Ndërsa disa liderë evropianë janë të bashkuar në kundërshtimin ndaj tij, ndikimi i Musk mbetet një sfidë e vazhdueshme për proceset politike globale.