Pse PS nuk ka në program integrimin në BE? Plarent Ndreca i përgjigjet aktivistes në Rinvote

Marjana Koçeku, një nga të rinjtë pjesëmarrës në emisionin “Rinvote” në Euronews Albania, e pyeti kandidatin për deputet Plarent Ndreca, se përse nuk e ka përfshirë në programin e saj PS integrimin në BE, pse ka vonesa në përafrimin e ligjeve me BE-në dhe ndërkohë që në administratë hapen vende pune në prag fushate zgjedhore.

Ndreca nuk iu përgjigj direkt pyetjes për programin, por u përqendrua kryesisht te çështjet e negociatave dhe emërimeve në administratë duke thënë se gjatë qeverisjes së socialistëve është arritur “hapja e negociatave”.

“Legjislacioni është përafruar, ne në vitin 2014 kemi marrë statusin e kandidatit për në BE dhe në mars 2020, besoj jeni informuar se janë hapur negociatat…” – tha Ndrecaj.

Ky qëndrim i kandidatit të PS-së nxiti diskutim, pasi Koçeku këmbënguli se kjo gjë nuk është thënë nga Komisioni Evropian, për hapje negociatash. Ndrecaj replikoi duke saktësuar se “është marrë vendimi për hapjen e negociatave”.

“Kryeministri nuk ka thënë për hapje negociatash, por duhet t’i dalloni gjërat, por ka thënë për mbajtjen e një konference ndërqeveritare që pritet të mbahet, por hapja e negociatave është një vendim i marrë, ndërsa mbajtja e konferencës për të përcaktuar kornizën e negocimit nuk është mbajtur, shpresojmë të bëhet brenda 6 muajve, por nuk është në dorën tonë, por në dorën e anëtarëve të BE-së,” – tha Ndrecaj.

Për sa i përket hapjes së vendeve të punës në administratë gjatë fushatës, Ndrecaj hodhi poshtë pretendimin se po bëhen punësime militantësh. Ai tha se hapjet e vendeve të reja të punës “në kushtet kur bëhen me konkurs ka një proces rutinë i parashikuar në ligj”. Përballë këmbënguljes së Koçekut, Ndrecaj theksoi se pavarësisht udhëzimeve të KQZ-së dhe Kodit Zgjedhor, procedurat e emërimeve me konkurs nuk ndalohen.