PSG përmbys Barcelonën në Spanjë, ndalen Manchester City dhe Juventus

Pa fituesin e Topit të Artë në fushë dhe katër lojtarë të tjerë të formacionit bazë, PSG ia doli të mposhtë Barcelonën me përmbysje në transfertë në përballjen për raundin e dytë të Champions League.

Francezët dominuan në pjesën më të madhe të lojës në ndeshjen e luajtur në Estadi Olímpic Lluís Companys, e cila përfundoi me shifrat 1-2.

Parizienët e nisën jo mirë, pasi në minutën e 19’ Barcelona kaloi përpara me Ferran Torres ndërsa fraksioni i parë i ndeshjes u mbyll në barazpeshë pas realizimit të Mayulu me asistin e Nuno Mendes.

Në fraksionin e dytë, francezët luajtën më mirë dhe u vendosën në gjysmëfushën e kundërshtarit, por goli i fitores do të vinte në minutën e 90’, ku i ardhur nga stoli Gonçalo Ramos vulosi triumfin 2-1 për kampionët në fuqi.

Lojtari i ndeshjes u përzgjodh Nuno Mendes, i cili dhuroi një tjetër paraqitje mbresëlënëse.

Në sfidat e tjera, 3 pikët i morën edhe Napoli, Arsenal, Dortmund, Newcastle dhe Qarabag.

Surpriza e mbrëmjes mund të konsiderohet padyshim Monaco, e cila barazoi me Manchester City-n në shifrat 2-2, por edhe dueli tjetër Villarreal–Juventus që po ashtu nuk pati fitues dhe përfundoi me rezultatin 2-2. Një tjetër barazim në mbrëmje ishte ai mes Leverkusen dhe PSV, 1-1.

Rezultatet

Qarabag 2–0 FC Copenhagen

Royale Union SG 0–4 Newcastle

Arsenal 2–0 Olympiacos

Barcelona 1–2 PSG

Bayer Leverkusen 1–1 PSV

Dortmund 4–1 Athletic Bilbao

Monaco 2–2 Manchester City

Napoli 2–1 Sporting Lisbone

Villarreal 2–2 Juventus

• Mbrëmje magjike në Champions, spektakël e gola pa fund dhe krisje angleze
• Finalja e parakohshme në Champions League, Barcelona përballë gjigandëve francezë