PS fiton Bashkinë Vorë, kandidati i PD s’arrin as 700 vota

Kandidati i Partisë Socialiste, Blerim Shera ka fituar garën për Bashkinë e Vorës.

Shera ka marrë mbi 7 500 vota duke mundur me një diferencë të thellë kandidatin e ‘Shtëpisë së Lirisë’, Lulzim Vrana, i cili mori 2 589 vota.

Kandidati i Partisë Demokratike, Ymer Marku ka marrë vetëm 687 vota në garën për bashkinë e Vorës.

Në procesin zgjedhor morën pjesë pak më shumë se 11 mijë votues, që përbëjnë 36% të zgjedhësve në këtë bashki.

Numërimi i votave është kryer në mënyrë elektronike, ku 209 kanë rezultuar të pavlefshme.

Pak pas publikimit të rezultatit, përfaqësuesi politik i PS për Qarkun e Tiranës, Erion Veliaj tha se pas kësaj fitoreje presin dhe në Rrogozhinë të marrin mbi 50% të votave.

Veliaj tha se procesi i votimit dhe numërimit ka qenë elektronik dhe roli i komisionerëve ka qenë dytësor.

Ai foli për nevojën e depolitizimit të administrimit të zgjedhjeve dhe ofrimin e votimit dhe numërimit elektronik në të gjithë vendin.

“U provua se funksionoi dhe pse jo që në zgjedhjet e ardhshme të kalojmë në një proces të tillë”, tha Veliaj.