Administratori i firmës së ndërtimit, ku punonte shtetasi G. S., i cili humbi jetën më 17 dhjetor 2024, gjatë punimeve për rikonstruktimin e një objekti në zonën e kalasë së Beratit, është kapur dhe arrestuar nga policia.
Aksidenti në punë ndodhi gjatë rikonstruksionit të një objekti, ku G. S. u godit nga një masiv guri që u shkëput nga zona e kalasë.
Për këtë ngjarje janë arrestuar më herët edhe investitorja e objektit dhe drejtuesja teknike e firmës së ndërtimit, ndërsa administratori i firmës, shtetasi Ç. H., ishte shpallur në kërkim.
Ai është kapur nga shërbimet e Komisariatit të Policisë Berat dhe është vënë në pranga. Gjykata e Beratit kishte caktuar masën e sigurisë “Arrest në burg” për të, për akuzat e “Shkeljes së rregullave të mbrojtjes në punë”, “Punësimi i paligjshëm” dhe “Mospagimi i taksave dhe tatimeve”.
Materialet procedurale janë referuar për veprime të mëtejshme në Prokurorinë e Beratit. Policia vijon hetimet për të zbardhur të gjitha rrethanat e ngjarjes dhe për të marrë masat përkatëse ndaj personave përgjegjës.
LEXONI GJITHASHTU:
- E zë poshtë masivi shkëmbor, ndërron jetë punëtori 47-vjeçar në Berat
- Shoku denoncon zhdukjen e 63-vjeçarit në Berat, dyshimet e para
