Emri| Punonjësi i aeroportit të Rinasit i vjedh pasagjerit orën 20 mijë euro

Një 24-vjeçar, Klajdi Qerimi ka rënë në prangat e Policisë, pasi dyshohet se ka vjedhur një orë me vlerë rreth 20 mijë euro, në një prej bagazheve të udhëtarëve në Aeroportin e Rinasit.

Përmes një njoftimi, Policia bën të ditur se autori i vjedhjes është shtetasi me inicialet K. Q., me detyrë punonjës i sektorit të ngarkim-shkarkimit të bagazheve, në vendqëndrimin e avionëve.

Ndërkohë në cilësinë e provës materiale u sekuestrua ora e dyshuar e vjedhur, me vlerë rreth 20 000 euro.

Njoftimi i Policisë:

Rinas-Vodhi një orë të shtrenjtë, në një prej bagazheve të udhëtarëve,  identifikohet, kapet dhe vihet në pranga 24-vjeçari, punonjës për ngarkim-shkarkimin e bagazheve, në vendqëndrimin e avionëve në Rinas.

Sekuestrohet ora me vlerë rreth 20 000 euro.

Specialistët për Hetimin e Krimeve të Komisariatit të Policisë Rinas, në vijim të punës për goditjen e paligjshmërive, pas kallëzimit të depozituar nga një 30-vjeçar, se kushëririt të tij, i cili kishte udhëtuar nga Rinasi drejt Athinës, i kishin vjedhur një orë të kushtueshme të cilën e mbante në bagazhet e tij dhe vjedhjen e së cilës ai e kishte konstatuar në momentin kur kishte arritur në Athinë, menjëherë kanë organizuar punën për dokumentimin e plotë ligjor të rastit dhe vënien përpara përgjegjësisë ligjore të autorit të dyshuar.

Si rezultat i veprimeve operative dhe procedurale të kryera nga Seksioni për Hetimin e Krimeve, u arrit të identifikohet si autor i kësaj vjedhjeje, shtetasi K. Q., me detyrë punonjës i sektorit të ngarkim-shkarkimit të bagazheve, në vendqëndrimin e avionëve.

Në vijim të veprimeve u bë  arrestimi i autorit të dyshuar, shtetasit K. Q., 24 vjeç, banues në Krujë, me detyrë punonjës për ngarkimin dhe shkarkimin e bagazheve, në aeroportin e Rinasit.

Në cilësinë e provës materiale u sekuestrua ora e dyshuar e vjedhur, me vlerë rreth 20 000 euro.

Materialet i kaluan Prokurorisë.

LEXONI GJITHASHTU:

• U arrestua kur vodhi monopatinën, 30-vjeçari autor i 11 vjedhjeve
• Çifti italian bie pre e vjedhjes në Vlorë, hajdutët thyejnë xhamin e makinës