Putin: 1 miliard dollarë për “Bordin e Paqes” të Trump nëse SHBA zhbllokon asetet ruse

Presidenti rus, Vladimir Putin mësohet se diskutoi mundësinë e dhurimit të 1 miliard dollarëve për “Bordin e Paqes” të homologut të tij amerikan, Donald Trump gjatë takimit me të dërguarin special, Steve Witkoff, dhe Jared Kushner. Por kjo “dhuratë” e Putin vjen me disa kushte pasi ai kërkon në këmbim që disa asete ruse të zhbllokohen nga SHBA-të.

“Gjatë shkëmbimit të pikëpamjeve mbi Bordin e Paqes, u theksua gatishmëria jonë për të drejtuar një miliard dollarë në buxhetin e kësaj organizate nga asetet ruse të ngrira nga administrata e mëparshme amerikane”, u tha gazetarëve ndihmësi i politikës së jashtme të Kremlinit, Yury Ushakov.

Ushakov shtoi se pjesa tjetër e fondeve nga ato rezerva, të cilat u ngrinë pas pushtimit të Ukrainës nga Moska në vitin 2022, mund të drejtohen drejt rindërtimit të territoreve të prekura gjatë operacioneve luftarake.

“Kjo do të ndodhte vetëm pasi të përfundohej një traktat paqeje midis Rusisë dhe Ukrainës”, shtoi ai.

Trump të enjten në Davos me disa liderë botëror nënshkruan themelimin e “Bordit të Paqes” për Gazën. Ai u ofron shteteve anëtare vende të përhershme për një çmim prej 1 miliard dollarësh. Putin, i cili është ftuar të bashkohet me bordin, ende nuk e ka firmosur nënshkrimin.