Putin i hapur për dialog me Macron, Kremlini: Varet nga vullneti politik

Presidenti rus Vladimir Putin është i gatshëm për dialog me homologun e tij francez Emmanuel Macron, nëse ekziston “vullnet i ndërsjellë politik”. Kështu deklaroi zëdhënësi i Kremlinit, Dmitri Peskov, për agjencinë shtetërore ruse të lajmeve RIA.

Deklarata vjen pasi Macron, menjëherë pas përfundimit të samitit të Bashkimit Evropian në Bruksel, u shpreh se është i gatshëm të bisedojë me presidentin rus. Peskov rikujtoi se edhe vetë Putin, gjatë një konference të madhe për shtyp të mbajtur të premten, kishte theksuar se është i hapur për dialog me presidentin francez.

“Nëse ekziston një vullnet i ndërsjellë politik, kjo mund të shihet vetëm pozitivisht”, tha zëdhënësi i Kremlinit.

Macron i bëri këto deklarata në orët e para të mëngjesit, pas samitit ku BE-ja arriti një marrëveshje për dhënien e një huaje prej 90 miliardë eurosh për Ukrainën, për të mbuluar nevojat financiare të vendit gjatë dy viteve të ardhshme.

“Mendoj se mund të jetë sërish e dobishme të flasim me Vladimir Putinin”, deklaroi presidenti francez para mediave, duke shtuar se disa liderë ndërkombëtarë, përfshirë homologun e tij amerikan Donald Trump, po mbajnë kontakte me Kremlinin.

Sipas Macronit, Evropa dhe Ukraina kanë interes të krijojnë një kornizë të përbashkët për rifillimin e dialogut.

“Nëse jo, do të flasim vetëm mes nesh ose përmes negociatorëve që bisedojnë veçmas me rusët, gjë që nuk është zgjidhja më e mirë”, theksoi ai.

Ndërkohë, të dërguar të Donald Trump kanë zhvilluar një sërë takimesh të ndara me përfaqësues rusë, ukrainas dhe evropianë, pa ndonjë përparim konkret drejt një marrëveshjeje për t’i dhënë fund luftës në Ukrainë.

Këtë javë, negociatorë nga Ukraina, vendet evropiane dhe Shtetet e Bashkuara u takuan në Miami, Florida. SHBA-të u përfaqësuan nga Steve Witkoff, i dërguari i posaçëm i Shtëpisë së Bardhë, dhe Jared Kushner, dhëndri dhe këshilltari i presidentit amerikan.

Nga ana tjetër, i dërguari rus Kirill Dmitriev zhvilloi bisedime me dy përfaqësuesit amerikanë, të cilat i cilësoi si “konstruktive”, duke shtuar se ato do të vijojnë edhe sot. Sipas burimeve zyrtare, nuk parashikohen kontakte dypalëshe mes Moskës dhe Kievit, as takime trepalëshe.

Ndërkohë, presidenti ukrainas Volodymyr Zelensky i bëri thirrje Uashingtonit që të rrisë presionin ndaj Moskës, në përpjekje për të shtyrë Rusinë drejt një zgjidhjeje diplomatike.