Putin në konferencën e fundvitit, bën zotimin për luftën në Ukrainë

Presidenti rus Vladimir Putin ka deklaruar se paqja në Ukrainë do të vendoset vetëm atëherë kur Rusia të ketë arritur objektivat e saj.

Putin ka mbajtur të enjten konferencën më të madhe për shtyp që nga nisja e pushtimit të Ukrainës në shkurt të 2022-shit.

Elementi kryesor në fjalimin e tij ka qenë sovraniteti rus. “Ekzistenca e vendit tonë pa sovranitet është e pamundur. Vendi thjesht nuk do të ekzistonte”, ka thënë Putin.

Sa i takon objektivave që Rusia kërkon të arrijë në Ukrainë, kreu i Kremlinit ka nënvizuar se ato mbeten: “asgjësimi i regjimit nazist të Ukrainës, shfuqizimi ushtarak i saj dhe rikthimi i statusit neutral”.

Putin ka bërë të ditur se aktualisht Rusia ka në total 617 mijë trupa që po luftojnë në Ukrainë dhe ka shtuar se krahas 300 miijë personave të thirrur në forcat e armatosura, 486 mijë të tjerë kanë hedhur vullnetarisht firmat si ushtarë me pagesë.

Më tej, presidenti rus ka vijuar duke thënë se vendi i tij mund të vazhdojë të ecë përpara pavarësisht sanksioneve ekonomike dhe izolimit të Perëndimit.

Një tjetër pikë e prekur prej tij kanë qenë edhe marrëdhëniet me Shtetet e Bashkuara dhe BE-në. Ai e ka cilësuar Amerikën si një vend të rëndësishëm, por e ka akuzuar atë për imperializëm. “Shtetet e Bashkuara duhet të respektojnë popujt dhe vendet e tjera. Rusia është gati të riparojë marrëdhëniet kur ato ta bëjnë këtë”, ka shtuar Putin.

Putin e ka mbajtur konferencën për shtyp duke kombinuar linjën e tij direkte telefonike me rusët, me një audiencë të gjerë gazetarësh. Numri i pyetjeve që kanë shkuar në adresë të tij ka kaluar atë të 2 milionëve.

LEXONI GJITHASHTU:

• “Gishti në buton”, kush është truproja i Putin që mund të ndezë Luftën III Botërore
• Vizita në SHBA, Zelensky: Putini duhet të humbë patjetër në Ukrainë