Putin në Vietnam: Partneriteti strategjik me Hanoin, një nga prioritetet e Rusisë

Vladimir Putin po viziton këtë të enjte Vietnamin në një përpjekje për të përforcuar lidhjet me Azinë jug-lindore, teksa izolimi i Rusisë thellohet.

Rusia është e rëndësishme për Vietnamin për dy arsye; së pari sepse është furnizuesi më i madh i pajisjeve ushtarake dhe sepse teknologjia ruse për kërkimin e naftës ndihmon Vietnamezët të ruajnë sovranitetin në ujërat e detit të Kinës së Jugut.

Liderët e Vietnamit dhe Rusisë kanë thënë se duan të forcojnë lidhjet ndërsa dyshja u takuan në kryeqytetin vietnamez, Hanoi.

Presidenti vietnamez To Lam ishte plot lëvdata për homologun e tij rus, Vladimir Putin, duke e uruar atë për rizgjedhjen e fundit.

Putin, në këmbim, tha se forcimi i një partneriteti strategjik me vendin e Azisë juglindore ishte një nga prioritetet e Rusisë.

“Urime shokut tonë për mbështetjen dërrmuese gjatë zgjedhjeve të fundit presidenciale, duke nënvizuar besimin e popullit rus”, tha Presidenti Lam pasi e priti Putin në tapetin e kuq.

Shtetet e Bashkuara kanë kritikuar vizitën për dhënien e një platforme për presidentin Putin për të promovuar luftën e tij të agresionit në Ukrainë.

Vietnami ende vlerëson lidhjet historike që ka me Rusinë, edhe pse punon për të përmirësuar marrëdhëniet e tij me Evropën dhe SHBA-në

Që kur Putin vizitoi Vietnamin në 2017-n, shumë gjëra kanë ndryshuar. Aktualisht Rusia përballet me sanksione për pushtimin e Ukrainës dhe Gjykata Ndërkombëtare Penale ka shpërndarë një urdhër-arrest për krime lufte për Putin.

Putin mbërriti në Vietnam nga Korea e Veriut, ku me liderin Kim Jong Un nënshkroi një akord që parashikon mbështetje reciproke në rast lufte.

Korea e Veriut është akuzuar se furnizon me armë Rusinë për të vijuar luftën në Ukrainë, në këmbim të asistencës teknologjike që mund të forcojë kërcënimin e Penianit në zhvillimin e programit të armëve bërthamore dhe raketave.