Putin: Trump ka axhendën e tij, mendoj se vepron me mirëbesim

Donald Trump ka “axhendën dhe qëllimet e tij, ndërsa ne jemi të fokusuar tek të njerzit tanë”, tha Vladimir Putin në një intervistë për India Today gjatë vizitës së tij në Indi.

Ai shtoi se axhenda e Rusisë nuk është kundër askujt, por ka si qëllim mbrojtjen e interesave përkatëse.

Presidenti rus vazhdoi duke thënë se presidenti amerikan “vepron me mirëbesim”, ndërsa kur u pyet si e vlerëson homologun amerikan, ai tha:

“Unë kurrë nuk gjykoj kolegët e mi. As ata me të cilët kam bashkëpunuar në të kaluarën, as udhëheqësit aktualë të shteteve të ndryshme. Këto vlerësime duhet t’i bëjnë qytetarët që zgjedhin liderin e tyre në zgjedhje”.

Për zhvillimet në Ukrainë, Putin tha se e rëndësishme për Kievin është të kuptojë se konflikti do të përfundojë vetëm përmes negociatave, duke shtuar se “Rusia nuk e mohon Ukrainës të drejtën për të siguruar sigurinë e saj, por jo në kurriz tonin”.

Ndërkohë,në lidhje me tarifat e SHBA-së ndaj kompanive ruse të naftës, Putin vuri në dukje se ata që përpiqen të “pengojnë marrëdhëniet ekonomike me vende të treta, përfundimisht përballen me vështirësi dhe pësojnë humbje”.

“Jam i sigurt se sapo kjo perspektivë të vendoset, taktikat e tilla të ushtrimit të presionit të jashtëm do të zhduken”, shtoi ai.

Sa i përket energjisë, Putin theksoi se “mjeti i bashkëpunimit tonë energjetik me Indinë mbetet i pacenuar nga rrethanat aktuale, ndryshimet politike të përkohshme apo madje nga ngjarjet tragjike në Ukrainë”.

LEXONI GJITHASHTU:

• Gjermania dërgon avionë në Poloni dhe Rumani për të mbrojtur hapësirat ajrore
• Gazetari ukrainas ndalon vajzën e Putinit në Francë: Babai yt më vrau vëllain