Qarkullonte me pistoletë në Kavajë, arrestohet 39-vjeçari

Policia e Kavajës ka finalizuar operacionin e koduar “Drawer”, ku u arrestua në flagrancë një 39-vjeçar, i kapur duke qarkulluar me automjet dhe i armatosur me pistoletë.

Gjatë kontrollit të automjetit, uniformat blu gjetën një armë zjarri të fshehur në një ndarje speciale ndërmjet dy sediljeve, si dhe municion luftarak, të cilat u sekuestruan si prova materiale.

Personi i arrestuar është identifikuar si Q. B., 39 vjeç, banues në Durrës. Ndërkohë, pasagjeri i automjetit, 33-vjeçari E. B. nga Tirana, po procedohet penal për veprën “Moskallëzim i krimit”.

Operacioni bëri pjesë në goditjet e njëpasnjëshme të Policisë ndaj armëmbajtjes pa leje, bazuar edhe në informacionet operative për shtetasin e armatosur që qarkullonte me automjet.