“Qëndrimet, i dini”- Abdixhiku flet sërish për ftesën e Kurtit për të qeverisur

Kreu i Lidhjes Demokratike të Kosovës, Lumir Abdixhiku, ka reaguar sërish në lidhje me ftesën për koalicion nga ana e Lëvizjes Vetëvendosje, duke refuzuar të japë detaje konkrete për qëndrimin e partisë së tij.

“Qëndrimet e Lidhjes Demokratike tashmë ju i dini”, u shpreh Abdixhiku para gazetarëve, ndërsa largohej nga selia e partisë. Duke shmangur një përgjigje të drejtpërdrejtë për ofertën e bërë nga kryetari i LVV-së dhe njëkohësisht kryeministri në detyrë, Albin Kurti, ai shtoi vetëm: “Pritni, keni durim, do të jem transparent si çdoherë tjetër.”

Deklarata e Abdixhikut vjen pas publikimit të një letre nga Albin Kurti, në të cilën ai i ofron LDK-së një marrëveshje për koalicion qeverisës.

“Jemi të interesuar për një marrëveshje politike me LDK-në, pavarësisht dallimeve tona ideologjike apo qeverisëse”, shkruan Kurti, duke theksuar se uniteti dhe prioritetet shtetërore duhet të mbizotërojnë mbi ndasitë partiake.

Megjithatë, përgjigjja e LDK-së mbetet ende e paqartë. Partia ka qenë kritike ndaj qasjes së LVV-së në qeverisje dhe nuk ka sinjalizuar ende nëse është e gatshme të ndryshojë pozicionin e saj.

Ndërkohë, mungesa e një shumice të qëndrueshme parlamentare vazhdon të pengojë konstituimin e institucioneve të reja, duke krijuar pasiguri politike dhe institucionale në vend.

LEXONI GJITHASHTU:

• Kurti i dërgon letër Abdixhikut: Ftesë zyrtare për bashkëqeverisje me LDK-në
• Kriza politike, gazetari: Kosova mund të shkojë në zgjedhje të reja