Qeveria dha 50 lekë për litër, reagon Shoqata e Transportit: Kemi nevojë dhe 3 muaj për subvencionin

Rritja e vazhdueshme e çmimeve të karburanteve po shton presionin mbi sektorin e transportit publik në vend. Operatorët urbanë dhe ndërqytetas paralajmërojnë se kostot e larta të naftës po vënë në rrezik funksionimin normal të shërbimit, ndërsa i kanë kërkuar qeverisë zgjatjen e skemës së subvencionimit edhe për tre muaj të tjerë, deri në fund të shtatorit 2026.

Shoqata e Transportit Publik Qytetas i ka drejtuar një kërkesë zyrtare qeverisë për vijimin e kompensimit financiar me 50 lekë për litër karburant, masë e aplikuar që prej muajit mars, në kuadër të krizës së çmimeve të hidrokarbureve.

Më 13 maj, ministri i Infrastrukturës dhe Energjisë, Enea Karakaçi, bëri të ditur se operatorët e transportit publik do të vijojnë të përfitojnë subvencionimin për naftën, ndërsa shoqatat e sektorit kërkojnë tashmë që mbështetja të zgjatet edhe për periudhën korrik-shtator 2026.

Sipas operatorëve, çmimet e larta të karburantit kanë rënduar ndjeshëm barrën financiare të kompanive të transportit, duke vështirësuar mbulimin e kostove operative dhe garantimin e vazhdimësisë së shërbimit për qytetarët.

Në shkresën drejtuar institucioneve, Shoqata Kombëtare e Transportit Ndërqytetas thekson se vazhdimi i skemës së kompensimit është i domosdoshëm për të shmangur reduktimin e flotës së autobusëve dhe uljen e frekuencave të linjave, si dhe për të ruajtur përballueshmërinë e transportit publik për qytetarët.

Operatorët argumentojnë se karburanti mbetet një nga kostot kryesore të aktivitetit të tyre dhe se pa mbështetje financiare rrezikohet stabiliteti i sektorit.

Më herët, kompanitë e transportit kanë paralajmëruar disa herë për vështirësitë ekonomike, ndërsa në periudha të ndryshme pezulluan pjesërisht shërbimin në Tiranë dhe disa qytete të tjera të vendit, duke reduktuar flotën deri në 60%.