Qeveria propozon draftin për të garantuar plotësimin me mjekë në vitet e ardhshme

Ministrja e Shëndetësisë, Ogerta Manastirliu dhe e Arsimit, Evis Kushi janë takuar me studentët e mjekësisë këtë të premte ku propozuan punësimin dhe kontributin e tyre në atdhe pas përfundimit të studimeve, për një periudhë të caktuar kohore.

Në mënyrë që kjo ide të vihet në zbatim, sipas Kushit, duhet të jetë në dakordësi me studentët.

“Ne duhet që të kemi një dakord si të gjithë bashkë, ta kuptojmë të gjithë se sa e rëndësishme është kjo.  Një ide e jona është që secili prej jush, të gjithë studentët e programit mjekësi e përgjithshme, duke filluar nga viti i ardhshëm është që të nënshkruhet një marrëveshje paraprakisht me universitetin dhe dy  ministritë, që pas studimeve ju do të qëndroni të jepni minimumi tre vite kontribut për Shqipërinë, për shoqërinë, për atdheun. Se është edhe patriotike veç të tjerave,” – deklaroi ministrja.

Manastirliu u shpreh se ky nuk është vetëm një kontribut për vendin, por edhe një mundësi që studentët të mundet të marrin më shumë eksperiencë për formimin profesional.

“Kjo çfarë ne propozojmë nuk është një praktikë unikale në botë, është një praktikë që e përdorin shumë vende, të cilat duan dhe projektojnë dhe punojnë jo vetëm për të sotmen, por edhe për të nesërmen. Punojmë për atë angazhim të madh që ne të gjithë së bashku kemi, për t’u kujdesur për shëndetin e fëmijëve, prindërve, gjyshërve dhe kjo është ajo që ne na drejton në punën tonë të përditshme. Të gjitha këto politika dhe programe që ne ndërmarrim, bëhen me këtë synim, për t’i paraprirë sfidave që bota po i has, ashtu sikurse dhe ne, por edhe për të ndërtuar programe të cilat të kenë qëndrueshmëri dhe mbi të gjitha, të realizohem në kohën e duhur,” – deklaroi ministrja.

Ndërsa rektori i universitetit të mjekësisë Prof. Dok. Arben Gjata u ndal te reformat e ndërmarra nga qeveria gjatë këtyre viteve, saç është mbajtja e të rinjve në vendin tonë.

LEXONI GJITHASHTU:

• Përdorimi i kanabisit për qëllime mjekësore/ Manastirliu: Projektligji u miratua
• “Dhimbje gjoksi e mpirje”, mjeku turk shpjegon shenjat e para të sëmundjes së zemrës