Qytetarët serbë në veri të Mitrovicës përkrahin pushtimin e Ukrainës

Qytetarët serbë në veri të Mitrovicës mbajnë qëndrim pro-rus dhe mbështesin veprimet e Kremlinit në Ukrainë. Këtë e thonë qytetarët dhe analistët.

Mijat Molotoviç, profesor nga veriu i Mitrovicës, thotë se lufta në Ukrainë është e shpikur dhe e imponuar nga NATO-ja.

“Kjo është një luftë e shpikur, të cilën e ka imponuar NATO-ja. Luftërat gjithmonë udhëhiqen për ta përmirësuar armatimin, teknikën luftarake etj. Në fakt, NATO-ja këtu kërkon vetëm tregojë se është fituese, ndërsa Rusia kërkon kufijtë e saj dhe po mbron veten”, u shpreh Mijat Molotoviç, qytetar në veri të Mitrovicës.

Ranko Petroviç krahason luftën në Ukrainë me atë të Kosovës.

“Asnjë luftë nuk është e mirë për qytetarët, kudo që ndodhë. Kush po e nxitë, këtë e dinë këta lart të cilët po udhëheqin me këto luftëra sepse ne qytetarët e Kosovës e kemi përjetuar vetë në lëkurën tonë. Askush nuk ka të drejtën e luftës as Rusia dhe as Amerika”, tha ai.

“Unë nuk jam e njoftuar sa duhet, andaj nuk di çka të them dhe të gjykojë. Secili ka mendimin e vet, vërtetë nuk di. nuk e di nëse edhe Putini është fajtor, ndoshta edhe ka vepruar drejt, as këtë nuk e di”, u shpreh qytetarja Milanka Gjuriç.

Por, Branimir Kërstiç, gazetar dhe analist politik, thotë se shumica e serbëve të Kosovës mbajnë qëndrim pro-rus dhe mbështesin pushtimin e Ukrainës.

Sipas tij, kjo ndodhë për shkak të qëndrimit të tyre glorifikues se rusët dhe serbët janë vëllezër.

“Shumica dërmuese e serbëve në Kosovë janë të qëndrimit pro-rusë dhe mbështesin atë që po ndodhë në Ukrainë. Mbështesin politikën e Vladimir Putinit, duke u thirrur në paralajmërimin e federatës ruse kur bëhet fjalë për prezencën e NATO-s, afër kufijve të Rusisë. Paralajmërimi i një paradoksi të tillë është pothuajse i pakuptimtë, thjesht për arsye se serbët konsiderojnë se Kosova i është marrë Serbisë falë NATO-s, në anën tjetër marrjen e Ukrainës nga ana e Rusisë, ata e shohin krejtësisht ndryshe”, deklaroi analisti Branimir Kërstiq.

Ai thotë se është momenti i fundit kur Serbia duhet të përcaktohet nëse dëshiron të kthehet në kohën e parahistorisë, apo t’i bashkohet botës së civilizuar.

Në Kombet e Bashkuara, Serbia ka votuar për rezolutat që dënojnë agresionin rus kundër Ukrainës dhe ka votuar për ta përjashtuar Rusinë nga Këshilli për të Drejtat e Njeriut i OKB-së, por Beogradi nuk i është bashkuar Bashkimit Evropian për të vendosur sanksione ndaj Moskës.

Zyrtarët serbë vazhdimisht kanë përsëritur se Beogradi nuk do të mbështesë sanksionet ndaj Moskës, pasi kështu mbron interesat e shtetit.

LEXONI GJITHASHTU:

• Vuçiç thotë se do të rezistojë sa të mundet që të mos e sanksionojë Rusinë
• Kosova aplikoi në KiE, Vuçiç: Do të mbledh Këshillin e Sigurisë Kombëtare