Rama: Ankimimet nuk pezullojnë më vendimet për zhvillimin e territorit

Kryeministri Edi Rama, në një konferencë për shtyp të mbajtur këtë të premte, foli për masat e reja të qeverisë në drejtim të forcimit të kontrollit mbi territorin.

Një nga risitë e prezantuara lidhet me procedurat e ankimimeve administrative dhe gjyqësore, të cilat, sipas Ramës, nuk do të kenë më efekt pezullues ndaj vendimeve përfundimtare të autoriteteve përgjegjëse për zhvillimin e territorit.

“Një tjetër masë e marrë është që ankesat administrative dhe gjyqësore nuk do të pezullojnë ekzekutimin e vendimit përfundimtar të autoritetit përgjegjës për zhvillimin e territorit.

Kjo është një masë e rëndësishme, sepse ka pasur shumë spekulime dhe abuzime. Kanë ndodhur raste ku vendime janë pranuar ‘në heshtje’, pasi pala e pushtetit lokal apo një agjenci qendrore nuk është paraqitur fare në gjykatë,” u shpreh Kryeministri.

Ai theksoi se nga tani e tutje, vendimet e institucioneve përkatëse do të ekzekutohen menjëherë, pavarësisht ankimimeve, duke u dhënë fund vonesave dhe bllokimeve të qëllimshme.

LEXONI GJITHASHTU:

• Rama: Do të kërkohet leje edhe për muret rrethuese, kanë zaptuar pjesë të trotuareve
• “As ujë e drita pa dalë hipoteka”, Rama: S’do lejohen të futen në apartamente