Rama i përgjigjet Berishës, i kujton zgjedhjen e Bamir Topit President

Kryeministri, Edi Rama duke iu përgjigjur akuzave të Berishës për proces ‘farsë’ në negociatat për zgjedhjen e presidentit të ri, i rikujtoi zgjedhjen e Bamir Topit si kryetar të shtetit.

“Kur Saliu ishte gjallë, më kujtohet që u zhvillua në Parlament një proces që në fund çoi në zgjedhjen e njëanshme të Bamir Topit”, tha Rama.

Kreu i qeverisë me këtë deklaratë të bërë të enjten në parlament iu përgjigj deklaratës së Berishës në përfundim të mbledhjes së grupit parlamentar të PD.

Kreu i mazhorancës iu referua rastit të votimit për Topin president në vitin 2007 me 85 vota duke marrë dhe vota nga përfaqësues të PS në parlament.

Opozita e braktisi sallën e parlamentit, por ‘urdhrit’ të Ramës iu nuk bindën 7 deputetë të PS, që cilësoheshin si mbështetës të ish-kryeministrit Fatos Nano.

Zgjedhja e Topit presidenti u bë në raundin e katërt. Ky zhvillim më pas solli dorëheqjen e Ben Blushit nga kryetar i grupit të PS.

Në atë kohë, Kushtetuta parashikonte se zgjedhja e Presidentit bëhej vetëm me shumicë të cilësuar, 84 vota.

Një vit më pas, në 2008, Kushtetuta u ndryshua me marrëveshje Berisha-Rama, duke bërë që kreu i shtetit të zgjidhej me shumicë të cilësuar vetëm në tre raundet e para.

Aktualisht, Kushtetuta parashikon se Presidenti i ri mund të zgjidhet me shumicë të thjeshtë në raundin e katërt dhe të pestë. PS ka në parlament 74 mandate.

LEXONI GJITHASHTU:

• Berisha: Konsultimet e PS për Presidentin janë farsë