Rama kritika gjyqtarit, zbardhet vendimi i Boshkut! AMP dhe Avokati i Shtetit kundër

Euronews Albania siguron vendimin e gjyqtarit të Gjykatës Administrative të Shkallës së Parë Tiranë, Marko Boshku, i cili pezulloi përjashtimin nga detyra të drejtorit rajonal të Agjencisë së Mbikëqyrjes Policore Vlore-Gjirokastër, Glodian Ahmetaj.

Gjyqtari, ndër arsyet që ka pranuar sigurimin e padisë, rendit edhe procesin e vetingut që i mohohet zyrtarit të AMP-së.

“Në këtë kuadër, Gjykata çmon të theksojë që në rastin konkret ndërprerja e procesit të vlerësimit kalimtar dhe periodik të kërkuesit Glodian Ahmetaj në kuadër të Ligjit nr. 12/2018 ‘Për vlerësimin kalimtar dhe periodik të punonjësve të Policisë së Shtetit, Gardës së Republikës dhe Agjencisë së Mbikëqyrjes Policore në Ministrinë e Brendshme’, pa një vendim përfundimtar, nëse zbatohet menjëherë urdhëri për transferimin dhe më pas për përjashtimin e tij nga AMP-ja, sipas Urdhërit Nr.582, datë 05.08.2025 ‘Për transferim dhe emërim në detyrë të një punonjësi të AMP-së’ dhe Urdhërit Nr.590, datë 06.08.2025 ‘Për përjashtim nga detyra të një punonjësi të AMP-së’, të Drejtorit të Përgjithshëm të AMP-së, cenon të drejtën për punë të tij dhe konsiderohet dëm i rëndë në kuptim të nenit 29 të Ligjit nr.49/2012 ‘Për gjykatat administrative dhe gjykimin e mosmarrëveshjeve administrative’, për shkak se nuk kemi të bëjmë vetëm me ecurinë profesionale të kërkuesit Glodian Ahmetaj në AMP, por ndërprerja e procesit të vlerësimit kalimtar dhe periodik pa një vendim përfundimtar pengon zhvillimin profesional dhe në karrierë të kërkuesit, e konkretisht duke e penguar për të konkuruar në pozicione të cilat janë subjekt i vlerësimit kalimtar dhe periodik. Për më tepër që kërkuesi Glodian Ahmetaj është emëruar në pozicionin: Drejtor në Drejtorinë Rajonale të AMP-së Vlore & Gjirokastër me procedurën e ngritjes në detyrë. Për rrjedhojë, Gjykata vlerëson se dëmi që shkaktohet duhet të kategorizohet si i rëndë,” thuhet në arsyetimin e gjyqtarit Boshku.

Zyrtari i AMP-së fillimisht ishte transferuar këshilltar i drejtorit të përgjithshëm, më pas u përjashtua nga radhët e agjencisë pasi rezultoi se në Sarandë, babai i tij banues në Durrës, kishte ndërtuar pa leje në një zonë të Ksamilit në një sipërfaqe toke të zaptuar.

AMP dhe Avokatura e Shtetit nuk janë pajtuar me vendimin e gjyqtarit Boshku, duke dërguar në Gjykatën Administrative një kërkesë për revokimin e gjyqtarit Boshku, e cila pritet të shqyrtohet nga një tjetër gjyqtar.

Në vendimin e gjyqtarit Boshku parashikohet se në rast mosekzekutimi të pezullimit të aktit administrativ të AMP-së, të ngarkohet përmbarimi për ekzekutimin detyrueshëm të tij.

LEXONI GJITHASHTU:

• Rama kritikoi gjyqtarin e Boshku, reagon Shoqata Kombëtare Gjyqtarëve
• Rama nga Brukseli: Jemi martuar me detyrim me perandori të tjera në të shkuarën