Rama në konferencë me Costa: Kemi dakordësi 100% me BE, fokusi jonë zbatimi i reformave

Kryeministri Edi Rama në konferencën e përbashkët për shtyp me presidentin e Këshillit Evropian Antonio Costa e falenderoi këtë të fundit për angazhimin e drejtpërdrejtë ën rrugëtimin e Shqipërisë që nga nisja e procesit të negociatave me BE.

Rama theksoi fakti se Shqipëria nuk ka asnjë shqetësim që e ndan nga BE vetëm shqetësime që e bashkojnë, pasi siç tha “kemi dakordësi 100 për qind për të gjitha çështjet me BE”.

“Takimi me ty është një orë mësimi nga një eksperiencë e madhe dhe nga një njohje e thellë e çështjeve të Evropës. Dua ta falënderoj për angazhimin, përpara se ne të përfundojmë mbylljen e fazës së parë dhe hapjen e kapitujve në një kohë që po përballemi me sfida të përbashkëta.

Ne ndajmë plotësisht me presidentin bindjen se pjesa kryesore e punës sonë këtu mbetet puna jonë, që do të thotë se ne kemi detyra për të përmbushur, jo thjesht për hyrjen në Bruksel, por për përmirësimin e institucioneve, pushtetit të pavarur në Shqipëri, dhe tani në këtë fazë theksi kryesor është zbatimi i atyre reformave që janë kryer me sukses, apo ligjeve që do të vazhdojnë të hyjnë nga BE.

Është një proces me shumë sfida. Presidenti na ka sugjeruar të rrisim përpjekjet për të njohur publikun me të gjitha këto sfida. Kemi dakordësi 100 për qind për të gjitha çështjet me BE”, tha Rama.