Rama në Vlorë apo në Durrës, Haxhiu: Kryeministri duhet të heqë dorë nga të dy mandatet

Kryeministri Edi Rama ka mundur të marrë mandatin e deputetit në qarkun Vlorë dhe Durrës, por cilin prej tyre do të zgjedhë? Kjo është tema që diskutuan mbrëmjen e sotme në emisionin ‘Shock’ analistët Baton Haxhiu dhe Andi Bushati.

Për analistin Baton Haxhiu, kryeministri Edi Rama nuk duhet të marrë asnjë prej mandateve, duke qenë se e arriti maksimumin e vet politik duke i marrë të dy mandatet, ndaj duhet t’ua lërë këto mandate të tjerëve që e pasojnë në listë.

Sipas tij, votat e marra në mandatin e Durrësit ishin vetëm për Ramën dhe jo për PS, ndërsa në Vlorë fitorja shpjegohet me investimet e mëdha që e kanë shndërruar këtë qytet me një standard europian.

“Kandidimi në Durrës ishte që të mos humbte mandatin e tetë, 15 mijë vota në Durrës ishin për Ramën jo për PS, ndaj Rama ka merita pse Durrësi e mori mandatin e 8. Vlora ka arsyet e veta se nuk do koment si duket Vlora sot. Dhe është i vetmi qytet që ka përmbajte maksimale europiane. Rama duhet të heqë dorë nga dy mandate dhe t’ia lërë kush e ka radhën. Sepse ka hyrë për fituar dhe ka arritur maksimumin e vet politik”, u shpreh analisti Haxhiu.

Ndërkohë, për analistin Andi Bushati kandidimi i Edi Ramës në Durrës është i turpshëm, pasi kryeministri sipas tij shfrytëzoi tragjedinë e këtij qyteti të prekur nga tërmeti për të blerë me para në dorë votat.

“Lista e Durrësit është 4 përfaqësues të bandave dhe 40 mln euro nga buxheti i shtetit për të vjedhur votat e durrsakëve”, u shpreh analisti Bushati.