Rama: Porti i ri Durrësit, një kapitull i ri për ekonominë dhe sigurinë e Shqipërisë

Kryeministri Edi Rama mori pjesë këtë të martë në ceremoninë për hapjen e garës për ndërtimin e Portit të ri të Durrësit në Porto Romano.

Rama në fjalën e tij theksoi se Porti i ri i Durrësit është një nga projektet më të rëndësishme strategjike për Shqipërinë dhe rajonin, që i përgjigjet gjithashtu edhe fluksit gjithmonë e në rritje duke zgjeruar kapacitetet përpunuese.

Rama tha se heqja e portit të Durrësit nga qendra e qytetit dhe zhvendosja e tij në Porto Romano është largimi i një plage mjedisore dhe kriminale nga zemra e qytetit.

Ai theksoi se ndërtimi i portit të ri do të ndikojë në zhvillimin e ekonomisë por dhe rritjen e sigurisë së Shqipërisë.

“Shqiptarët kanë pritur shumë, shekuj që mund në fund të bëjnë zgjedhjen e tyre. Gjithmonë kanë jetuar nën zgjedha që kanë ardhur si rezultat i zgjedhjeve të të tjerëve për ta. Për herë të parë në këto 30 e kusur vite, jetojnë me zgjedhjen e tyre. Kanë zgjedhur më në fund që ky vend të bëhet pjesë e familjes së bashkuar të vendeve demokratike. E shkuara është një barrrë shumë e madhe për ne. E shkuara është njësoj si Port i Durrësit në zemër të qytetit, i cili është një plagë mjedisore që ka bërë në vazhdimësi dëm të madh për prespektivën edhe imazhin e qytetit. Por dhe një plagë në aspektin socio-ekonomik pasi e dimë shumë mirë që gjithë ajo rrëmujë ka qenë edhe një zonë e veprimtarive të paligjshme dhe kriminale. Largimi i Portit të Durrësit nga qendra e qytetit dhe vendosja e tij këtu, tërësisht me përmasa të reja, është hapja e një kapitulli të ri në historinë e qytetit dhe hapja e një kapitulli të ri të historisë së ekonomisë dhe sigurisë së vendit tonë”, tha Rama.

LEXONI GJITHASHTU:

• “Hajduti s’ka ngjyrë”- Rama: Kush fut duart në xhepat e qytetarëve, do përgjigjet
• Rama bën parashikimin, zbulon emrin e vajzës që do të drejtojë PS në të ardhmen