Rama: Projektet me arkitektë të huaj po tërheqin investitorë dhe nxisin turizmin

Gjatë një konference në Qendrën për Inovacion dhe Teknologji “NEST”, kryeministri Edi Rama vlerësoi projektet e realizuara në bashkëpunim me arkitektë ndërkombëtarë si nxitëse të interesit të investitorëve dhe si instrument për krijimin e një identiteti të ri urban në Shqipëri.

“Projektet me arkitektë të huaj kanë ngjallur interes të shtuar, i cili po shtrihet gjithnjë e më shumë edhe në radhët e investitorëve. Nuk mjafton më thjesht një projekt estetik. Është thelbësore që ato të realizohen besnikërisht, sipas vizionit të arkitektit dhe jo të transformohen rrugës në ndërtime që vetë arkitekti nuk i njeh më,” tha Rama.

Ai theksoi nevojën për ndërhyrje ligjore që të garantohet zbatimi i saktë i projekteve, duke kritikuar fenomenin e devijimeve gjatë procesit të ndërtimit.

“Kemi parë raste kur projektet miratohen me një standard dhe realizohen me një tjetër. Apartamente që blihen në ‘gropë’ rishiten më pas me fitime të mëdha nga blerësit fillestarë, jo nga ndërtuesit. Kjo çon në probleme serioze me cilësinë dhe besueshmërinë e tregut,” shtoi ai.

Në vijim, Rama foli për potencialin e madh njerëzor që ka Shqipëria në fushën e arkitekturës, duke përmendur se vendi mund të nxjerrë figura me ndikim global në pesë vitet e ardhshme.

“Pavarësisht se shkolla e arkitekturës në Shqipëri nuk është ndër më të mirat në Evropë, ajo ka nxjerrë talente të jashtëzakonshme. Detyra jonë është t’i mbajmë këta profesionistë të lidhur me vendin,” tha kryeministri.

Ai përfundoi duke theksuar se ndërtimi i një tregu të besueshëm dhe modern për arkitekturën do të jetë jo vetëm një shtysë për zhvillimin ekonomik, por edhe për pozicionimin e Shqipërisë në hartën ndërkombëtare si destinacion kulturor, turistik dhe estetik.

LEXONI GJITHASHTU:

• Linda Rama: Teknologjia nuk është argëtim, si e edukoj djalin tim 11-vjeçar
• Linda Rama: Shqipëria ka potencial për më shumë investime të huaja, sektorët kyç
• “Nga lavazhi i trurit tek ëndrrat për Perëndimin”, tranzicioni sipas Linda Ramës