Rama sot në Athinë, takime me Kyriakos Mitsotakis dhe Nikos Dendias

Kryeministri i Shqipërisë, Edi Rama pas vizitës 2-ditore në Turqi, po zhvillon sot një tjetër vizitë.

Kreu i qeverisë shqiptare ndodhet në Athinë, ku do të takohet me homologun e tij grek, Kyriakos Mitsotakis dhe ministrin e Jashtëm, Nikos Dendias.

“Në Athinë për një drekë pune me Kryeministrin Mitzotakis, për të diskutuar mbi koordinimin e mëtejshëm në luftën e përbashkët kundër Covid19; forcimin e mëtejshëm të marrëdhënieve strategjike mes dy vendeve; bashkëpunimin rajonal dhe integrimin europian të rajonit tonë”, shkruan Rama në një postim në Twitter. 

Mediat në Greqi raportojnë se, Mitsotakis do të shtrojë një darkë për kryeministrin shqiptar, ndërsa me Dedias, Rama pritet të ketë një takim privat.

Kjo vizitë vjen në një kohë kur Parlamenti pritet të miratojë dekretin e presidentit për zgjerimin me 12 milje në Jon.

Ndërsa çështja e marrëveshjes për kufirin detar paraprakisht është vendosur që të zgjidhet në Gjykatën e Hagës.

Lexoni gjithashtu:

Rama të premten në Greqi, Baton Haxhiu: Shqipëria pritet të marrë një rol në politikën e jashtme