Raporti i Venecias, reagon PD: Rama tentoi të kapë Kushtetuesen, Meta zero shkelje

Partia Demokratike ka reaguar përmes sekretarit të përgjithshëm, Gazment Bardhi, pas publikimit të opinionit final të Komisionit të Venecias në lidhje me përplasjen President-Parlament për emërimet e anëtarëve të Gjykatës Kushtetuese.

Sipas Bardhit, Komisioni i Venecias në raportin e tij mbi 20 faqësh, vulosi regjimin në ikje të kryeministrit Edi Rama, që sipas tij tentoi të uzurpojë edhe Gjykatën Kushtetuese. Ai thotë se sot u konfirmua se kreu i shtetit nuk ka shkelur Kushtetutën e vendit siç pretendonte mazhoranca qeverisëse.

Ai mes tjerash thotë se bërja sa më parë funksionale e Gjykatës Kushtetuese është jo vetëm e rëndësishme për demokracinë në Shqipëri, por edhe për kushtet për fillimin e negociatave me BE. 

“Përshëndes vendimin e Komisionit të Venecias që vulosi sot se regjimi në ikje i Edi Ramës tentoi të kapë edhe Gjykatën Kushtetuese. Komisioni i Venecias konfirmoi qartë se ka zero shkelje të Kushtetutës nga Presidenti i Republikës në betejën legjitime kundër kapjes së Gjykatës Kushtetuese. Kjo është një tjetër provë sesi Edi Rama ka vetëm një strategji me drejtësinë: ose ta kapë, ose ta bllokojë. Bërja sa më parë funksionale e Gjykatës Kushtetuese është jo vetëm e rëndësishme për demokracinë në Shqipëri, por edhe 1 nga 15 kushtet për fillimin e negociatave me BE”, shkruan ai.