Raportuesi i Parlamentit Evropian për Serbinë, Vladimir Bilçik deklaroi se pas marrëveshjes për targat, tanimë është radha e Prishtinës që të bëjë lëvizjen e saj.

Ai u shpreh se Bashkimi Evropian, pret që Prishtina të marrë masa, shkruan Euronews Serbia.

“Në këtë moment kur bëhet fjalë për targat, është e qartë se topi është në duart e Prishtinës dhe presim që Prishtina të marrë masa. Në të njëjtën kohë, ka ende kaq shumë pyetje të hapura që mund të zgjidhen vetëm nëse ekziston një vullnet i mirë për të lënë pas të kaluarën dhe për të parë nga e ardhmja”, theksoi ai.

Ajo e ardhme, siç vëren Bilczyk, duhet të jetë evropiane dhe e bazuar në pajtimin dhe mirëkuptimin se njerëzit në rajon duhet të gjejnë një mënyrë për të jetuar në paqe.

“Kjo është një çështje e rëndësishme dhe thelbësore për Beogradin dhe mendoj se është diçka që të gjithë e kuptojnë, sepse nëse bëhet përparim në këtë çështje, do të ketë përparim edhe në çështje të tjera”, tha Bilçik.

Kosova dhe Serbia më 23 nëntor në Bruksel kanë arritur marrëveshje për targat ilegale serbe.

Kryediplomati evropian, Josep Borell, ka thënë se Kosova do t’iu japë fund veprimeve të mëtejme të lidhura me riregjistrimin e makinave, derisa Serbia nuk do të lëshojë më targa të makinave me emra të qyteteve të Kosovës.

LEXONI GJITHASHTU

• Bislimi pas marrëveshjes për targat: Të vijojnë bisedimet për planin franko-gjerman
• SHBA përshëndet marrëveshjen për targat
• Kosova dhe Serbia arrijnë marrëveshje për targat