Referendumi i Moldavisë për në BE, Moska tenton të ndikojë tek votimi

Moldavia po bëhet gati për referendumin e së dielës për anëtarësimin në BE dhe për zgjedhjet presidenciale në një atmosferë të tensionuar.

Duke folur për Euronews, zëvendës kryeministrja e qeverisë pro-evropiane deklaroi se Rusia po përdor një shumëllojshmëri mjetesh për të ndikuar tek votimi.

“Fatkeqësisht kemi konstatuar një operacion masiv përmes mjeteve klasike të Kremlinit, por të aplikuara në një shkallë të paprecedent. Ka pasur para të pista që janë derdhur për politikanët tanë, për të përdorur palët pro-ruse për destabilizimin e situatës, për të korruptuar kandidatët dhe madje votuesit. Gjithashtu ka pasur një fushatë të fuqishme keqinformimi dhe propagande kundër BE-së”, u shpreh zëvendës kryeministrja, Cristina Gherasimov.

Rezultati i referendumit do të përcaktojë nëse anëtarësimi në BE do të përfshihet në Kushtetutë, gjë që kërkon konsensusin e më shumë se gjysmës së votuesve. Por një rezultat i tillë mund të çojë në tensione të mëtejshme, pasi separatistët pro-rusë kontrollojnë de fakto lindjen e vendit.

 “Ka pasur shumë shqetësim për destabilizimin e rajonit të Trans Nistrias. Në dy vitet e fundit, sidomos që nga pushtimi rus i Ukrainës, kemi arritur ta mbajmë situatën të qetë dhe të qëndrueshme në të gjithë vendin. Shpresojmë të vazhdojmë kështu”, tha Gherasimov.

Sipas sondazheve të fundit, presidentja pro-evropiane në detyrë, Maia Sandu rezulton fituese dhe shumica pritet të votojë në favor të anëtarësimit në BE në referendum.

LEXONI GJITHASHTU:

• Rusia dhe Ukraina këmbejnë të burgosur nga lufta
• Moldavia, Rumania e Ukraina marrëveshje për luftimin e dezinformatave ruse