Reforma në drejtësi, Kaso: Fakti që mazhoranca e proklamon si arritje të vetën, tregon se ose ka dështuar ose do dështojë

Silvana Rusi, një nga të rinjtë pjesëmarrës në emisionin “Rinvote” në Euroneës Albania e pyeti ekspertin për çështjet zgjedhore në PD, Ivi Kaso lidhur me përgjegjësinë që ka Partia Demokratike sa i përket vonesave në implementimin e reformës në drejtësi dhe a ndikoi bojkoti i parlamentit nga opozita në këtë vonesë.

Z. Kaso tha se mungesa e dakordësisë politike dhe konsensusi nuk e ka sabotuar reformën në drejtësi pasi sipas tij, pavarësisht rolit proaktiv të PD dhe pavarësisht se u bë gjithçka që PD të mos merrte pjesë në reformë, qëllimi i mazhorancës ishte ta kapte reformën në drejtësi.

Sipas z. Kaso, fakti që përfaqësuesi i mazhorancës e proklamon me të madhe si arritje të qeverisë tregon se reforma ose ka dështuar ose do të dështojë.

Ai tregoi se që në fillim të hartimit të reformës PD ka qenë pjesë e saj dhe ka shtruar çështjet që kërkonin zgjidhje dhe propozimet e veta që sipas ekspertit nuk u morën fare parasysh nga mazhoranca, pavarësisht fjalës së institucioneve ndërkombëtare si Komisioni i Venecias.

“Të gjitha kambanat e alarmit të ngritura nga PD, që nga drafti i reformës nuk u morën parasysh, ne ua kemi bërë të qartë edhe ndërkombëtarëve se arkitektura e re e drejtësisë e bënte të pamundur të arrihej në kohë implementimi i institucioneve  të reja. Nuk ka qenë mungesa e inputit tonë që e ka vrarë reformën, por mungesë e vullnetit të mazhorancës që edhe me ndryshimet e fundit tregoi se kërkon të kapë reformën”, tha z. Kaso.

Ai tha se kur PD të vijë në pushtet do ta përmirësojë reformën ‘duke kthyer mekanizmin e konsensusit në kuvendin e Shqipërisë për t’i bërë institucionet e drejtësisë të pavarura nga presioni i politikës.