Regjistrohet vdekja e parë në botë nga gripi i shpendëve

Një grua ka vdekur në Kinë nga gripi i shpendëve H3N8, një virus që qarkullon që nga viti 2002, por nuk ka shkaktuar ende asnjë vdekje njerëzore, tha Organizata Botërore e Shëndetësisë.

Gruaja që vdiq ishte një grua 56-vjeçare nga provinca Guangdong në Kinën juglindore. Ajo u sëmur më 22 shkurt dhe u shtrua në spital me pneumoni të rëndë më 3 mars. Sipas OBSH-së, vdiq më 16 mars.

“Pacientja kishte disa sëmundje themelore. Ajo ishte ekspozuar ndaj shpendëve të gjalla përpara se të sëmurej, si dhe zogjve të egër rreth shtëpisë së saj”, tha agjencia në deklaratën e saj.

“Asnjë nga kontaktet e saj të ngushta nuk ishte i infektuar dhe as nuk kishin shfaqur simptoma të sëmundjes”, thuhej në raport.

Gruaja mund të jetë infektuar kur ka rënë në kontakt me zogj të gjallë në një treg, por burimi i saktë i infeksionit ende nuk është përcaktuar.

Virusi H3N8 u shfaq fillimisht në Amerikën e Veriut dhe deri më tani shkencëtarët mendonin se mund të transmetohej te kuajt, qentë dhe fokat e elefantëve.

Nuk ishte zbuluar te njerëzit deri në pranverën e kaluar, kur dy raste jo-fatale u raportuan në Kinë në prill dhe maj.

OBSH nënvizoi se të dhënat e disponueshme tregojnë se virusi nuk transmetohet nga personi në person dhe për rrjedhojë rreziku i përhapjes në nivel kombëtar, rajonal dhe global konsiderohet “i papërfillshëm”.

OBSH theksoi, megjithatë, se është e nevojshme të monitorohet vazhdimisht situata, për shkak të rrezikut të mutacionit të virusit.

LEXONI GJITHASHTU: 

• 90% e atyre që humbasin patentën ngelin në ritestim
• “Patenta kushton sa një paketë cigaresh”, Gjinaj: Po prishet tregu i autoshkollave