Rezervimet për Dubai nga Shqipëria pezullohen pas përshkallëzimit të luftës në Lindjen e Mesme

Konflikti në Lindjen e Mesme ka ndikuar drejtpërdrejt në tregun e udhëtimeve nga Shqipëria. Rezervimet për Dubai, një prej destinacioneve më të preferuara të shqiptarëve, janë pezulluar, ndërsa agjencitë turistike raportojnë shtyrje dhe anulime të fluturimeve.

Rezervimet janë të ngrira dhe agjencitë po përballen me menaxhimin e situatës.

Aurela Baholli nga një agjenci turistike shpjegon se mbyllja e Dubait ka efekt zinxhir mbi industrinë e udhëtimeve, pasi qyteti përdoret si destinacion për pushime dhe si pikë tranziti drejt Lindjes së Mesme dhe Azisë. Për momentin, fluturimet janë shumë të kufizuara dhe agjencitë po përdorin linja alternative për të kthyer klientët.

Në tre muajt mars–prill–maj janë kryer rreth 1000 rezervime, por disa janë anuluar. Në total, mbi 20 mijë udhëtime drejt Lindjes së Mesme janë anuluar që nga nisja e konfliktit.

“Fluturimet nga dhe drejt Dubait janë të pezulluara. Për klientët që kanë udhëtuar, kompanitë ajrore mbulojnë kostot shtesë përmes rimbursimeve ose riskedulimeve. Paqartësia për kohëzgjatjen e sulmeve ka sjellë hezitime dhe Dubai nuk është më në krye të listës së destinacioneve për pushime”, thotë Aurela Baholli.

Situata ka detyruar shumë shqiptarë të rishikojnë destinacionet për pushimet, duke zgjedhur vende më të sigurta.