Rezultatet e Ligës së Kombeve: Fiton Italia, Anglia likuidon Greqinë

Italia nuk ka zhgënjyer në transfertën e Belgjikës, duke marrë një fitore minimale ndaj djajve, por që vlen shumë për situatën në grup. Axurrët, me 3 pikët e radhës, janë të konfirmuar si kryesues të grupit, ndërsa i tolerohet edhe një humbje me rezultat minimal në ndeshjen e fundit me Francën. Në përballjen e së enjtes, italianët u mjaftuan me një gol të Tonalit për të marrë pikët e plota dhe të qëndrojnë të parët.

Dominimi absolut i Francës ndaj Izraelit nuk vlejti, pasi përballja në fjalë u mbyll me rrjeta të paprekura. Trikolorët, edhe pse bombarduan portën e kundërshtarit, nuk arritën dot të gjejnë golin, por rezultatet negative të Belgjikës i japin mundësinë të qëndrojnë në vendin e dytë, që i avancon më tej në Ligën e Kombeve.

Pas humbjes në Londër, Anglia i ktheu reston Greqisë, duke e mposhtur pastër në transfertë. Watkins, Jones dhe një autogol i portierit Vlachodimos mjaftuan për 3 pikët e radhës për luanët britanikë, që marrin kreun e klasifikimit, duke zbritur Greqinë në vendin e dytë. Të enjten, fitore regjistruan edhe Austria, Irlanda, Norvegjia, Ishujt Faroe dhe Maqedonia e Veriut.

LEXONI GJITHASHTU:

• Grumbullohet Kombëtarja, Strakosha e Fetai analizojnë sfidat: Na presin 2 finale
• Ndeshja kundër Çekisë, kuqezinjtë besojnë te fitorja: E njohim mirë kundërshtarin