Rikompozimi i interierit për t’u përballur me mërzinë e izolimit

Ndërsa shumica janë izoluar në shtëpitë e tyre prej javësh për të shmangur kontaktet me persona të tjerë dhe për të ulur rrezikun e përhapjes së COVID-19 në Shqipëri, monotonia e përsëritjes ka një ndikim edhe mbi aspektin psikologjik.

Për të adresuar diçka të tillë, arkitektja Ana Gjymshana, ka krijuar një “lojë”, ku i fton njerëzit që t’i dërgojnë në Instagram fotografi të ambienteve të tyre të brendshme. Më pas, arkitektja u propozon atyre, përmes planimetrive dhe skicave, mënyra sesi mund t’i riorganizojnë këto ambiente.

Gjymshana e ofron falas këtë shërbim, si një mënyrë për t’i ndihmuar njerëzit që jo vetëm të angazhohen me diçka produktive, por të ndryshojë pamjen e ambienteve ku banojnë, çka mund të ketë ndikim pozitiv psikologjik tek ata.