Rikonstruksioni i rrugës në shkelje, bashkia nuk vendos tabela informuese

Tabelat e punimeve janë të detyrueshme të vendosen në momentin e hapjes së kantierit të ndërtimit, sipas një vendimi të Këshillit të Ministrave të vitit 2015.

Por këtë vendim bashkia e Durrësit e ka shkelur me të dyja këmbët në lagjen nr.17.

Kjo është rruga “Gjelbërimi”. Aty prej javësh kanë nisur punimet për rikonstruksionin e saj, por tabela informuese, që i shërben edhe transparencës, nuk duket gjëkundi.

“Këtu kanë filluar punimet, por këtu s’ka një tabelë”, thotë një qytetar.

Të painformuar dhe pa asnjë komunikim me bashkinë, banorët janë njohur me faktin kur projekti i rrugës u ka prekur me disa metra oborret e shtëpive.

“Mua 5 milionë lekë investim në oborr ma ka çuar 0 shteti. Ose të ma kompensojë, ose ta gjejë vetë të bëjë diçka”, shprehet një banor.

Ata nuk janë kundër projektit, por kërkojnë transparencë.

“Ne si banorë kemi kërkuar që të rehabilitohet zona, prandaj e kuptojmë që dhe prishje do bëhen, por të paktën shteti të njoftojë, të vendosë në dispozicion dokumentet dhe kaq”, thotë një qytetar.

Pavarësisht kërkesave për transparencë e informacion, banorët ende nuk kanë marrë një përgjigje zyrtare nga bashkia, për të cilën KLSH ka nisur një auditim lidhur me ligjshmërinë e punimeve.

LEXONI GJITHASHTU:

• Berisha: Veprimtaria Rama-McGonigal ka degëzime të mëdha në Tiranë e Durrës
• Kontrabandë nga Rusia, sekuestrohet anija me mijëra tonë naftë në Durrës