Rikthehen në skenë “Karnavalet e Korçës”, opereta do të luhet për 3 netë

“Karnavalet e Korçës”, një nga komeditë më të dashura të teatrove shqiptare u rikthye të hënën në skenë.

Nën regjinë e Inva Mulës, “Karnavalet e Korçës” erdhën në Teatrin Kombëtar të Operas dhe Baletit në një version të ri, të kënduar në formën e operas.

Batutat e njohura të komedisë morën një dimension të ri muzikor, duke sjellë një eksperiencë të veçantë për publikun.

Opereta shqiptare me tre akte, që ironizon shoqërinë feudale-borgjeze, përmes notave të humorit, mbetet një nga shfaqjet më të dashura për publikun.

Narrativa dhe loja aktoriale e shfaqjes sillet rreth fejesës së Afrovitit. I ati, Nikollaq Samarxhiu do një dhëndër të kamur për vajzën, e ëma, Olimbi, një dhëndër intelektual, e këtu nis gjithë konflikti në familjen e pasur korçare.

“Karnavalet” këtë herë erdhën nën dirigjimin e Elda Laros dhe dirigjentit të korit, Dritan Lumshi. Në rolet kryesore interpretojnë Solen Alla, Ivana Hoxha, Vikena Kamenica, Ramona Tullumani, Armando Likaj, Dorina Selimaj, Renisa Laçka, Erlind Zeraliu, Artur Vera.

Teatri i Operas dhe Baletit fton edhe publikun që t’i bashkohet atmosferës së karnavaleve dhe të jenë me maska.

Shfaqja do të luhet deri më 26 Mars.

LEXONI GJITHASHTU:

• Identifikohen 232 raste me tuberkuloz në Shqipëri, mjekja tregon rastet e riskuara
• Prokuroria në Kosovë ngre aktakuzë për ministrin Fikrim Damka, për 2 vepra penale