Rikthehen zjarret në malin e Skërficës, kërkohet ndërhyrje nga ajri

Zjarret janë rikthyer në malin e Skërficës duke djegur sipërfaqe të konsiderueshme kullote malore. Sipas Shërbimit Zjarrfikës të Gjirokastrës, sot në territorin e Bashkisë Delvinë, me përhapje të mundshme drejt Bashkisë Gjirokastër, është raportuar një vatër zjarri në Malin e Skërficës.

Shërbimi i Mbrojtjes nga Zjarri dhe Shpëtimit (MZSH) Gjirokastër ka njoftuar menjëherë shërbimin përkatës të MZSH Delvinë për ndërhyrje në terren. Orët e mesditës një grup zjarrfikësish është nisur drejt vendngjarjes me qëllim vënien nën kontroll të flakëve.

Zjarri vazhdon të jetë aktiv dhe në varësi të drejtimit dhe intensitetit të erës, ekziston rreziku që të marrë përmasa më të mëdha, duke kërcënuar pyllin e mbrojtur të Pikësit.

Shërbimi i MZSH Gjirokastër nuk ka mundur të ndërhyjë për shkak të largësisë dhe terrenit të thepisur malor, i cili e bën të pamundur ndërhyrjen efektive me mjete tokësore.

Duke marrë parasysh rrezikun e lartë që paraqet përhapja e flakëve në pyllin e mbrojtur të Pikësit cilësohet e domosdoshme një ndërhyrje emergjente nga ajri që do të shmangte dëmtime të parikuperueshme të sipërfaqeve pyjore të mbrojtura.

LEXONI GJITHASHTU:

• Zjarri në Shpirag lë pasoja të rënda, banorët kërkojnë përgjegjësi për dëmet
• Gjirokastër, reshjet e shiut shuajnë vatrat e zjarrit në Malin e Gjerë