Për herë të parë në 14 vite, Reali i Madridit dhe Milani përballen me njëra-tjetrën në një ndeshje Championsi, e cila pritet të zgjojë sërish rivalitetin mes dy prej ekipeve më të mira në historinë e këtij kompeticioni. Kuqezinjtë, jo me petkun e mëparshëm, por me një ekip jo të ekuilibruar, sfidojnë galaktikët, që pavarësisht ndryshimeve, dinë se si të qëndrojnë pranë trofeve. Kjo është përballja e 16-të mes dy klubeve legjendare në Ligën e më të mirëve, ku secila ka nga 6 fitore, ndërsa 3 sfida janë mbyllur në barazim.
Alaba, Carvajal dhe Courtois nuk janë ende gati. Në anën tjetër, tek ekipi i Fonsecas mungojnë Bennacer, Florenzi dhe Gabbia, ndërsa favoritë janë spanjollët. Dueli pritet të dhurojë spektakël, pasi në fushë zbresin 22 trofe Champions.
Me interes, mbrëmjen e së martës pritet edhe Liverpool-Leverkusen, dy nga skuadrat që dinë se si të luajnë futboll të bukur. Kjo është përballja e pestë mes tyre në këtë garë evropiane, ku të kuqtë ia kanë dalë të marrin 3 fitore, ndërsa 1 i takon aspirinave. Në fushë zbresin gjithashtu Juventus, Manchester City, Dortmund dhe Leipzig. Dy përballjet që nisin më herët janë PSV-Girona dhe Slovan Bratislava-Dinamo Zagreb.
