Rikthehet procesi në Hagë ndaj ish-krerëve të UÇK-së, sot pyeten dëshmitarët

Ka nisur në Hagë procesi i paraqitjes së provave nga Zyra e Prokurorisë Speciale, përkatësisht dëgjimi i dëshmitarëve. Prokuroria ka bërë të ditur se ka rreth 300 dëshmitarë me anën e të cilëve synon të faktojë akuzat e ngritura ndaj Hashim Thaçit, Kadri Veselit, Jakup Krasniqit dhe Rexhep Selimit.

Ata po akuzohen nga Zyra e Prokurorit të Specializuar me akuza për krime kundër njerëzimit si përndjekje, burgosje, akte çnjerëzore, torturë, zhdukje dhe vrasje, si dhe me 4 pika për krime lufte si arrestim, ndalim arbitrar, torturë dhe vrasje të paligjshme.

Sipas aktakuzës, këto krime janë kryer në territore të ndryshme të Kosovës dhe Shqipërisë si në Likoc, Jabllanicë, Llapushnik, Drenoc, Malishevë, Bajgorë, Majac, Zllash, Kleçkë, Kukës dhe Rahovec.

Ndërkaq, në prill të 2022, ZPS-ja ka paraqitur aktakuzë të ndryshuar, ku i ka zgjeruar akuzat për krime lufte edhe në Gjilan, Budakovë dhe Semetisht.

Personat që janë ndaluar dhe dërguar në këto zona përshkruhet se ishin serbë, bashkëpunëtorë të tyre ose përkrahës të LDK-së.

Më 4 prill 2023 filloi gjyqi ndaj katër ish-krerëve të UÇK-së, pas më shumë se dy vjetësh.

Hashim Thaçi, Kadri Veseli, Rexhep Selimi dhe Jakup Krasniqi po qëndrojnë në paraburgim në Hagë prej nëntorit të vitit 2020.

LEXONI GJITHASHTU:

• Krasniqi thirrje për trupën gjykuese në Hagë: Mos përdorni shënimet e mia si prova
• Avokati: Nëse Rama mbështet Thaçin, nuk duhej të takohej me Vuçiç ditën e gjyqit