Rikthim i rëndësishëm te Tirana, mesfushori Ismajli lë pas dëmtimin

Tirana vijon përgatitjet në prag të sezonit të ri futbollistik, me bardheblutë që kanë kryer disa lëvizje në merkato. Sezoni i ri pritet të jetë me shumë sfida për skuadrën e udhëhequr nga Vangjel Mile, por lajmi i mirë është rikthimi i mesfushorit Qëndrim Ismajli. Ky i fundit ka lënë pas dëmtimin në shpinë që e la disa javë larg fushave, teksa ndeshja e tij e fundit me fanellën bardheblu është ajo me Pogradecin në Play-Out.

Euronews Albania mëson se futbollisti nga Kosova ka vijuar stërvitjen individuale dhe shumë shpejt do të jetë nën urdhrat e Miles, që e ka mjaft të nevojshëm Ismajlin në nisje të këtij sezoni futbollistik.

Qëndrim Ismajli u bë pjesë e Tiranës sezonin e kaluar, ku zhvilloi paraqitje mjaft pozitive, si një lojtar polivalent në mesfushë dhe mjaft teknik. Në ditët në vijim lojtari shqiptar kthehet në kryeqytet, për të rinisur një tjetër sezon në të cilin do të konfirmojë vlerat e tij.