Administrata Tatimore ka rimbursuar 6.1 milionë euro për 7,700 të vetëpunësuar në muajin dhjetor. Ajo fton edhe 449 tatimpaguesit e mbetur të deklarojnë të dhënat e llogarive të tyre bankare për të mbyllur procesin e kthimit të parave.

Më shumë se 95% e të vetëpunësuarve, që kishin paguar tatim në fillim të vitit, i kanë marrë paratë e tyre mbrapsht në dhjetor. Lajmin e bën të ditur për Euronews Albania, Drejtoria e Përgjithshme e Tatimeve, e cila bën rimbursimin e subjekteve dhe pret që procesi të përmbyllet plotësisht.

E drejta e rimbursimit nuk humbet për këta të vetëpunësuar, të cilët tashmë duhet të kalojnë në një procedurë më të gjatë për të marrë paratë e tyre mbrapsht.

Shuma e rimbursuar deri më tani arrin në 6.1 milionë euro dhe mbeten për t’u hedhur edhe 50 mijë euro të tjera deri në përmbushjen e plotë të vendimit. Ndërkohë, sistemi i tatimeve do të jetë i kufizuar nga data 31 dhjetor deri në 5 janar, në disa prej shërbimeve që lidhen me platformën E-albania apo korrigjimin e deklaratave.