Forcat e FNSH ndërhyjnë në Velipojë, spraj me piper ndaj banorëve, disa humbin ndjenjat

Pasditen e sotme, pas disa orë ndërprerje ka rinisur aksionin për shembjen e disa objekteve në bregdetin e Velipojës.

Aksioni i IKMT ka hasur në kundërshtimin e banorëve dhe pronarëve të bizneseve, të cilët më herët u mbështetën dhe nga kryebashkiakja e Shkodrës Voltana Ademi, që janë përplasur me punonjësit e IKMT duke përdorur mjete të forta.   

Në momentin që në Velipojë kanë mbërritur forca të Ndërhyrjes së Shpejtë dhe punonjës të IKMT-së për të nisur shembjen, qytetarët kanë dalë me lopata në krahë për të mbrojtur pronat e tyre.

Korrespondenti i Euronews Albania Tedor Gjerga teksa raportoi nga vendngjarja tha se është dashur ndërhyrja e rreth 100 forcave të FNSH me spraj me piper në drejtim të pronarëve të një biznesi që do të shembej, pasi pati një rezistencë të madhe nga ana e tyre.

“Është dashur ndërhyrja e 100 forcave të FNSH me spraj me piper në drejtim të pronarëve të këtij biznesi, nga i cili tashmë kanë mbetur gërmadhat. Banorët deri në fund kanë bërë rezistencë, duke kërkuar një urdhër, një vendim të formës së prerë për prishjen e bizneseve”, tha korrespondenti i Euronews Albania.

Mund të lexoni gjithashtu:

Shembja e bizneseve në Velipojë, kryebashkiakja Ademi: Kjo është dashakeqësi, duan t’i vënë kazmën Shkodrës