Rinis gjyqi ndaj Salvinit, akuzohet për pengmarrje dhe moskryerje të detyrës

Rinisi të premten në Palermo gjyqi kundër Matteo Salvinit.

Zëvendës kryeministri, njëkohësisht ministër i Infrastrukturës, u paraqit në gjykatë për t’u përgjigjur për akuzat e pengmarrjes dhe refuzimit të kryerjes së detyrave zyrtare, që ishin përgjegjësi e tij.

Faktet datojnë në gusht të 2019-s, kur Salvini bllokoi zbarkimin në ishull të anijes me 147 emigrantë në bord. Lidhur me çështjen, ai ka mbajtur qëndrimin që kishte dhe asokohe. “Eci me kokën lartë dhe krenar për vendimet e mia”, ka thënë Salvini.

Duke folur për gazetarët, ai ka shtuar se gjatë kohës që ishte ministër i Brendshëm, zbarkimet e anijeve me emigrantë ranë me 90 për qind.

“Kjo solli më pak nisje dhe rrjedhimisht më pak vdekje, më pak dramë dhe më pak para për trafikantët, pasi ishte prioritet i qeverisë të luftonte trafiqet”, ka thënë Salvini.

Megjithatë, ka nga ata që besojnë se lideri i Ligës veproi vetëm për të siguruar vota.

LEXONI GJITHASHTU:

• Aleanca e ekstremit të djathtë në BE, Salvini dhe Le Pen bashkë në fushatë
• Itali, qeveria mbyll portet, Salvini: Po mbrojmë kufijtë tanë