Romakët e lashtë i përdornin jashtëqitjet si ilaç 1900 vjet më parë

Arkeologët kanë zbuluar mbetje materiale brenda një shisheje qelqi 1,900-vjeçare, të cilat përfaqësojnë provën e parë të drejtpërdrejtë të përdorimit të jashtëqitjeve për qëllime mjekësore në Romën e lashtë, raporton portali Live Science.

Analiza kimike zbuloi se mbetjet fekale ishin të përziera me trumzë për të maskuar erën dhe përzierja mund të jetë përdorur për të trajtuar inflamacionin ose infeksionin.

“Ndërsa punoja në depot e muzeut në Bergamo, vura re se disa enë qelqi përmbanin mbetje të caktuara”, tha arkeologu nga Universiteti Sivas Cumhuriyet në Turqi, Çenker Attila.

Në një studim të botuar në Journal of Archaeological Science, Attila dhe kolegët e tij detajuan analizën e tyre të përmbajtjes së një shisheje të vetme qelqi që përdorej për të ruajtur parfume, vaj ose ilaçe. 

Shishja prej qelqi ishte e vulosur me argjilë në kohët e lashta dhe u gjet në një varr në qytetin e lashtë të Pergamumit në Turqinë perëndimore.

Dy nga komponimet e identifikuara, koprostanoli dhe 24 përqind etilkoprostanoli, gjenden zakonisht në traktin tretës të kafshëve që metabolizojnë kolesterolin.

Një tjetër zbulim i rëndësishëm në mbetjet e gjetura ishte karvakroli, një përbërës organik aromatik i pranishëm në vajrat esencialë të bërë nga bimë të caktuara.