Ronela Hajati: Kënga ime, ndër më të mirat e Shqipërisë në Eurovision

Presioni për të nxjerrë një produkt të mirë për Eurovisionin është i madh, por në fund do të dalë diçka e mirë.

Kështu tha në studion e “Sot” në Euronews Albania Ronela Hajati, e cila do të përfaqësojë Shqipërinë në festivalin evropian të këngës, me këngën “Sekret”.

“Unë mendoj se kënga ime është ndër më të mirat që Shqipëria ka çuar në Eurovision” u shpreh Ronela.

Kënga po punohet nga një producent në Angli dhe ka pësuar ndryshime. Një pjesë e mirë e tekstit do të jetë në anglisht, për shkak të natyrës së festivalit.

Nga fillimi i marsit do të dalë produkti përfundimtar, bashkë me videoklipin.

Ajo tha se çdo element i videoklipit është i bazuar në mitologji, në legjendën e Gjarprit të Bistricës.

“Ashtu siç gjarpri ndërron lëkurën, edhe brenda videoklipit pësohet një shndërrim”, tha Hajati.

Ajo tha se në videoklip tregohet një histori dhe brenda është një personazh me emrin Vjosa, që përfaqëson lumin Vjosë, lumin e fundit të egër në Evropë.

“Videoklipi në fillim duket si përrallë, por ka shumë metafora”, tha Ronela Hajati, e cila zgjodhi që detajet e tjera t’i mbaje sekret, siç është titulli i këngës.

Ronela do të bashkëpunojë për performancën me koreografen Klaudia Pepa, për regjinë e videoklipit me Ledion Liçon, për kostumografinë me Niko Komanin, ndërsa pjesë e videoklipit do të jetë edhe Florian Agalliu.