Rrahën me grushte policin bashkiak, arrestohen babë e bir

Dy persona janë arrestuar këtë të enjte nga policia e Vlorës pasi kanë dhunuar një punonjës të Policisë Bashkiake, jashtë orarit zyrtar të punës së këtij të fundit.

Sipas informacioneve paraprake bëhet me dije se në pranga kanë përfunduar babë e bir, T. S., 61 vjeç dhe K. S., 36 vjeç.

Policia njofton se shkak i rrahjes me grushte të efektivit të policisë bashkiake është bërë një konflikt për motive banale.

Grupi hetimor po vijon punën për zbardhjen e plotë të rrethanave të ngjarjes.

Materialet proceduriale i kaluan Prokurorisë së Vlorës, për veprime të mëtejshme.

“Komisariati i Policisë Vlorë ka referuar materialet në Prokurori ku ka nisur procedimi penal për shtetasit T. S., 61 vjeç dhe K. S., 36 vjeç (babë e bir), të dy banues në Bestrovë, pasi dyshohet se ditën e djeshme, në lagjen “11 Janari”, gjatë një konflikti për motive të dobëta, kanë goditur me grushte shtetasin B. J., 37 vjeç, (punonjës i Policisë Bashkiake, jashtë orarit të punës)”, thuhet në njoftimin e policisë.