Rrëmbimi i tre policëve të Kosovës në Veri, reagon presidenti Begaj

Presidenti Bajram Begaj ka reaguar pas rrëmbimit të 3 efektivëve të policisë së Kosovës nga forcat serbe një ditë më parë në Veri.

Begaj e cilëson një akt të rëndë “provokativ për destabilizimin e Kosovës dhe të mbarë rajonit” dhe kërkon lirimin e menjëhershëm të tyre.

“Rrëmbimi i tre efektivëve të Policisë së Kosovës brenda territorit kosovar nga trupat serbe është një akt i rëndë provokativ për destabilizimin e Kosovës dhe të mbarë rajonit. E dënoj me forcë këtë akt dhe i bëj thirrje autoriteteve Serbe për lirimin e efektivëve kosovarë. Gjithashtu iu bëj thirrje partnerëve ndërkombëtarë që të ndërhyjnë dhe të shkurajojnë veprime të tjera të ngjashme. Një thirrje vëllazërore e bëj sërish për autoritetet e Kosovës për të mos rënë pre e provokimeve dhe për të dhënë kontributin e tyre për shtensionimin e situatës. Koordinimi me SHBA dhe BE për rikthimin në tryezën e dialogut është tepër i rëndësishëm”, shprehet Begaj.