Rrëzimi i avionit në Indi/Hetuesit gjejnë një regjistrues zëri në kabinën e pilotit

Hetuesit kanë gjetur regjistruesin e zërit në kabinën e pilotit (CVR) nga avioni i rrëzuar i Air India, një hap kyç në zbulimin e shkakut të aksidentit vdekjeprurës të javës së kaluar.

Avioni i Air India me destinacion Londrën, një Boeing 787-8 Dreamliner, u rrëzua menjëherë pas ngritjes të enjten nga qyteti perëndimor indian i Ahmedabadit. Të paktën 270 persona kanë humbur jetën , shumica prej tyre pasagjerë.

CVR kap audio nga kabina e pilotit, duke përfshirë bisedat e pilotëve, alarmet dhe tingujt e ambientit.

Regjistruesi i të dhënave të fluturimit (FDR), i cili regjistron parametra të rëndësishëm të fluturimit si lartësia, shpejtësia dhe performanca e motorit, ishte nxjerrë nga mbeturinat të premten.

Si CVR ashtu edhe FDR së bashku formojnë atë që njihet zakonisht si “kutia e zezë” e një aeroplani. Është një mjet jetësor në hetimet e rrëzimeve ajrore, duke i ndihmuar ekspertët të rindërtojnë momentet e fundit të fluturimit dhe të përcaktojnë shkakun e incidentit.

Kutia e zezë,  në fakt përbëhet nga dy pajisje, njëra për CVR-në dhe tjetra për FDR-në – të lyera me shirita reflektues për rikuperim më të lehtë pas një përplasjeje. Të dyja këto pajisje janë projektuar për t’i mbijetuar një përplasjeje.

Byroja e Hetimit të Aksidenteve të Avionëve në Indi (AAIB) po udhëheq hetimin për shkakun e rrëzimit, e ndihmuar nga ekipe nga SHBA-ja dhe Mbretëria e Bashkuar.

Të dielën, zyrtarë nga Bordi Kombëtar i Sigurisë së Transportit të SHBA-së (NTSB) inspektuan vendin e rrëzimit të aeroplanit.

“AAIB ka nisur një hetim të detajuar dhe Bordi Kombëtar i Sigurisë së Transportit i SHBA-së (NTSB) po kryen një hetim paralel sipas protokolleve ndërkombëtare, pasi avioni është prodhuar në Amerikë”, thuhet në një deklaratë të lëshuar të dielën.

LEXONI GJITHASHTU:

• Dëme në fushën energjetike, sulmet iraniane mund të paralizojnë ekonominë e Izraelit
• Irani kryen një valë të re sulmesh ndaj Izraelit