Kuvendi rrëzoi me 69 vota kundër kërkesën e kreut të PD, Sali Berisha për interpelancë urgjente me kryeministrin Edi Rama lidhur me ato që ai i cilëson abuzime me tenderët publikë nga familjarët e tij.
Deputetja e PD Albana Vokshi debatoi me drejtuesen e seancës plenare, Ermonela Felaj lidhur me kërkesën e depozituar nga Berisha, emri i të cilit sipas saj “tmerron” mazhorancën.
Nënkryetarja e Kuvendit Ermonela Felaj tha se të drejtën për interpelancë e ka një grup deputetësh të PD-së dhe se për Berishën ka një vendim që i është ndaluar pjesëmarrja në Kuvend.
”Është e turpshme kjo, e ka kërkuar Sali Berisha dhe ju nuk i përmendni as emrin. Do na thoni se për çfarë do të flasim tani. Jeni drejtuese, mos më cakto mua se çfarë do të flas. Ju po abuzoni me atë pozicion që iu është deleguar, nuk mund të komentoni fjalët e deputetit të opozitës. Emri i Sali Berishës ju tmerron. Kush është ai vendim gjykate që ja ndalon të ushtrojë të drejtën e deputetit”, tha Vokshi.
“Nuk ja ka dhënë gjykata të drejtën zotërisë në fjalë. Dihet botërisht se Berishës i është ndaluar pjesëmarrja në parlament me vendim gjykate, nuk vendos kuvendi dhe nuk vendosni as ju”, u përgjigj Felaj.
LEXONI GJITHASHTU:
- Gjykata i dha vulën, Berisha: Fitorja e sotme, më e rëndësishmja në historinë e PD
- Gjykata vendosi që Berisha të jetë kryetar i PD, flet për herë të parë Lulzim Basha
