Rriten rastet e dhunës në familje në Gjirokastër, 45 kërkesa për urdhër mbrojtje

Në Gjirokastër përgjatë këtij viti është konstatuar një rritje e rasteve të dhunës në familje dhe kërkesave për urdhër-mbrojtje në gjykatë.

Për periudhën janar-nëntor në policinë lokale janë referuar 22 raste të dhunës në familje ndërkohë që 45 të tjera janë dërguar në gjykatë për urdhër mbrojtje. Pjesa më e madhe e rasteve të dhunës janë regjistruar në familjet në zonat rurale por i konsiderueshmë është edhe numri i rasteve në qytete.

Shumica e personave që kërkojnë ndihmën e organeve të drejtësisë si shkak i konflikteve në familje janë gra që dhunohen fizikisht ose psikologjikisht nga bashkëshortët e tyre.

“Komisariatet në varësi kanë evidentuar rreth 22 raste të referuara pranë Prokurorisë dhe rreth 45 raste kërkesë-padi për urdhra mbrojtje nga viktimat që janë paraqitur për denoncim këtu, shumicën e rasteve të viktimave të kësaj dhune e kanë vajzat dhe gratë por përfshihen edhe personat e tjerë të familjes, është një fenomen realisht shqetësues”, tha Diana Haxhiaj – Specialiste për parandalimin e dhunës në Gjirokastër.

Problematike është rritja e rasteve të dhunës digjitale ndërsa bashkëjetuesit denigrojnë apo shantazhojnë njeri-tjetrin nëpërmjet telefonit apo rrjeteve sociale.

“Përmasa të gjera ka marrë jo vetëm dhuna në marrëdhëniet familjare por dhuna ne bazë gjinore në përgjithësi por sidomos dhuna digjitale, viktimat e kësaj dhune kanë përjetuar një herë në jetën e tyre dhunë digjitale”, shtoi  Haxhiaj.

Sipas sociologëve rritja e rasteve të dhunës në familje vjen si shkak i varfërisë ekonomike dhe situatës së vështirë financiare të familjeve, mungesës së arsimimit apo kulturës qytetare.

LEXONI GJITHASHTU:

• EMRI/ U gjet i djegur në makinë në Llogara, identifikohet viktima! Ishte ish-polic
• Lela i përgjigjet Lapajt: Adriatik mos e qelb, të shkrova me porosi të Berishës