Rritja e çmimeve në Kosovë, Kurti: Jemi në demokraci

Kryeministri i Kosovës, Albin Kurti, deklaroi sot se ngritja e çmimeve të produkteve elementare dhe naftës është kosto e lirisë dhe demokracisë.

Ai tha se agresioni rus në Ukrainë po dikton rritjen e çmimeve dhe se qeveria nuk i vendos ato, e aq më pak ai, raporton KosovaPres.

Në mbledhjen e qeverisë, kreu i ekzekutivit premtoi rigorozitet në kontrollet për manipulimet dhe përfitimin e mundshëm në emër të krizës.

“E di dhe e kuptoj shqetësimin e secilit prej jush që është gjithsecili prej nesh për rritjen e çmimeve edhe pse kjo gjë nuk është shkaktuar nga ne, as si vend dhe as si qeveri. Ajo megjithatë po na prek edhe neve. Kur para 13 ditëve iu bashkuam botës perëndimore për të vendosur sanksione kundër agresionit rus në Ukrainë, një kosto e tillë ishte e pashmangshme. Mirëpo kjo është kosto e lirisë dhe demokracisë”, tha ai.

Ai tha se vartësia e Kosovës nga importi është e madhe, pasojë siç tha ai e ish-qeverive të kaluara që nuk e kanë trajtuar me prioritet prodhimin vendor.

“Për shumë gjatë prodhimtaria vendore nuk është trajtuar me prioritet nga ata të tjerët që dikur uleshin këtu në vend tonin. Por pavarësisht gjithë kësaj, si qeveri jemi munduar të zbusim ndikimin e kësaj situate. Sidomos tek ata që janë më të cenueshëm, pasi krizat na prekin të gjithëve, por jo të gjithëve njësoj”, shtoi ai.

LEXONI GJITHASHTU:

• Kurti: Kosova e shqetësuar se lufta e Putin mund vijë në Ballkan
• Kurti krijon Fondin e Sigurisë: Dhuroni për mbrojtjen e Kosovës